كيكه الاناناس

كيكه الاناناس

يا جماعه الخير اعشق هل كيكه اول شي لطعمها الخطير يعني هاي الكيكه الوحيده اللي بس اعملها بالبيت بتخلص بنفس اليوم .. والسبب التاني انو وجها حلو علي كان باشياء كثيره .. طبعا الكيكه سهله وبسيطه وبتنعمل بطرق كتير وانا بحترم كل الطرق بهل كيكه بالذات لانها ابداع كل شخص وابداعه فيها
نيجي للمقادير .. مقادير سهله وبسيطه ريحو حالكم

المقادير :
الطبقه العلويه
معلبه اناناس حجم كبير ( لو سمحتو بدنا المعلبه مع المي اللي فيها لا ترمو المي تبعها احنا بحاجتو هلئ بتشوفو )
اصبع ونص زبده
ثلاث ارباع كوب سكر بني فاتح ( سامعين فاتح ضروري )
ـــــــــ
خليط الكيك
كوب ونص دقيق
2 ملعقه صغيره هيل بودره ( لا تخافو وتقولو كتير وشي غريب ... مش غريب وقليل انا جربت اقلل الكميه بس صدقوني ضروري تحطوها )
2 ملعقه صغيره بيكنج باودر
رشه ملح ( دايما رشه الملح يعني بين اصبعين يعني اقل من ربع ملعقه صغيره )
ثلاث ارباع اصبع زبده بدرجه حراره الغرفه
كوب سكر
2 بيض
ملعقه صغيره فانيليا
نص كوب عصير الاناناس
ـــــــــــــــــــــــــــــــــــــــــــــــــــــــــــــــــــــــــــــ
نبدا اول شي نحضر صينيه مدوره مقاس 9 وهي الصينيه مفروض تكون موجوده بكل بيت يعني هاي من الاساسيات حضرو الصينيه ولا تدهنوها بشي زي ما هي بدون لا طحين ولا زيت 

نبدا نحضر الطبقه العلويه للكيكه اول شي نحط الزبده عالنار واول ما تذوب الزبده نضيف عليها السكر البني الفاتح

وهلئ رح نضل نحرك لا توقفو تحريك حركو من 3 ل 4 دقائق لحد مع التحريك المتواصل

 

شايفين بالصوره صار متل التوفي تجانس واعطاني لون حلو بنطفي النار وبناخد الخليط بنحطو عالصينيه وبنحط فوقو الاناناس

 

شايفين صبيت خليط الزبده والسكر وفوقو الاناناس اكيد مليون بالميه اذا مستعملين صينيه مقاس 9 رح تاخد سبع حبات اناناس لا اكثر ولا اقل الا ازا كان الاناناس اللي بتستعملوه حجمو اصغر

 

هيك خلصنا من الطبقه العلويه نيجي لخليط الكيك ::

 

اول شي بالمقادير مكتوب نص كوب عصير اناناس  انا بعرف اغلب البيوت ما فيها عصير اناناس مشان هيك احنا رح نعمل عصير اناناس ولو انو لو تجيبو عصير اناناس جاهز بعرف بطلع الطعم احسن بس هاد حل بديل وبرضو بعطي نتيجه حلوه

 

بنجيب المي تبعت علبه الاناناس + حبه اناناس بتكون زايده بالعلبه وبنحطهم بالخلاط شوفو الصوره لتفهمو اكتر

شايفين حطيت بالخلاط ماء علبه الاناناس + حبه الزايده بالعلبه ونخفق لحد ما تنفرم منيح

 

شايفين انفرم هاد الخليط بناخدو وبنصفيه وبناخد منو نص كوب ( واضح الحكي بنصيفيه وبناخد نص كوب منو وبس )

 

 

_ الدقيق + الهيل + البيكنج باودر + رشه الملح  = ننخل المكونات كلها مع بعض ونحركهم ليختلطو بالملعقه

 

 

يلا هلئ نبدا الشغل الحلو بخليط الكيك

نحط الزبده + السكر ونخفق

نخلط الزبده + السكر لحد ما يصير خليط كريمي من 4 ل خمس دقايق بنضل نخلط

بعدين نضيف بيضه ونخلط لحد ما تختفي ثم نضيف البيضه الثانيه + الفانيليا ونخلط لحد ما تتجانس وتختلط

 





هلئ  بنحط العصير علي الخليط + نص خليط الطحين ونخلط وبس يختلط منيح بنضيف باقي خليط الدقيق ونخلط لحد ما يختلط منيح يعني دقيقه دقيقتين

بناخد خليط الكيك وبنحطو فوق الاناناس

 

بنوزع الخليط بالتساوي ع قد ما بنقدر بالملعقه

 

بندخلها الفرن .. الفرن ساخن علي درجه حراره 350 يعني 180  .. والرف بنص الفرن .. بليز ارجوكم والكيكه بالفرن لا حد يفتح الفرن وازا في حد حشري ممنوع يدخل المطبخ لانو بتخرب الكيكه ازا حد فتح عليها

 

بتخلوها بالفرن 45 دقيقه تقريبا بنختبرها بعود خشب .. بندخل عود خشب بنص الكيكه وبنشوف ازا طلع نضيف يعني الكيكه ستوت وجهزت واذا طلع مش نضيف وعليه فتات كيك بنخليها كمان

يعني بتاخد 45 دقيقه

 

واول ما تطلع من الفرن علي طوووول بنكون محضرين صحن وبنقلبها عليه اول ما تطلع من الفرن

هيك نوع كيك بيتاكل ساخن بارد عن نفسي بحبو بارد

 

 هون انا حاط بنص كل اناناسه مربي فراوله بس لحتي اكسر اللون وتعطي شي حلو بس مو ضروري اكيد

صحتين ..

mjk cooking

كوكيز بالنوتيلا

اااه مين منا ما يعشق النوتيلا وبصراحه اللي ما يحب النوتيلا يروح ينتحر لانو ما يعرف ايش النكهه الصح .. اليوم بنعمل كوكيز بالنويتلا بصراحه اعشق الاشياء متل نوتيلا اوريو .. هاي الاطعمه فيها كميه ابتكار عاليه ما الها اي حدود وفينا نستعملها باي شي بالكيكات الحشو ..  تغليف الكيك .. الايسكريم .. تزين كب كيك .. حشو ماكارون .. ممكن ساندويش  .. اي شي خيارات بلا حدود مع النويتلا .

واليوم بنعمل كوكيز بالنوتيلا وانشالله بالمواضيع الجاي رح اعطيكم طريقه كيك بالنويتلا

النويتلا بتشتروه جاهز يا حلوين اكيد بنباع بمحل سحري اسمو سوبر ماركت اكيد مش بمكان تاني .. بس اللي حاب يعمل نوتيلا بالبيت مافي مانع ممكن نعمل نوتيلا بالبيت !!!! .. نعم ليش مستغربين فينا نعمل نوتيلا بالبيت وطعمو احلي بكتير من تبع السوق

 طريقه عمل النويتلا المنزليه :

اول شي نسخن الفرن 180  ( 350 ) ونحط 2 كوب بندق مع القشر ونحمصه بالفرن حوالي 15 دقيقه بقلب لونو دهبي واول ما يطلع من الفرن  بنحطه علي فوطه المطبخ وبنحط فوطه فوقو وبنفرك منيح لحد ما يروح القشر .. اظن سهله ما بدها شي .
بعدين
بعدين نحط الخليط بالمولينكس ونطحنو كتير منيح قد ما بنقدر وبعدين نضيف عليه ربع كوب كاكاو + كوب سكر بودره ونطحن ونزيد عليه الزيت لحد ما نحصل علي قوام اخف من قوام النويتلا سائل اكتر لانو رح يجمد بعدين

ــــــــــــــــــــــــــــــــــــــــــــ
بس هاد اللي كان بخص النويتلا هلئ بنيجي للشي الاساسي اللي عنا بالوصفه الكوكيز بالنويتلا..
بصراحه هاد اطعم كوكيز دقتو بحياتي وينفع عالفطور وكتير مفيد هلئ بتتعرفو عالمقادير

كوكيز بالنويتلا :

ا كوب شوفان
250 غرام طحين
80 غرام سكر
100 غرام سكر بني فاتح
125 زبده بدرجه حراره الغرفه
100 غرام نوتيلا
1 بيضه
نص ملعقه صغيره بيكنج صودا .. ربع ملعقه صغيره بيكنج باودر  .. رشه ملح ( رشه ملح بين اصبعين يعني )
125 جرام شوكولاته شيبس
ملعقه صغيره فانيليا سائله

انخل الدقيق + الملح + البيكنج باودر + الصودا  + الشوفان  ونحركهم مع بعض ونتركهم علي جنب

اضع النوتيلا + الزبده + نوعي السكر

رح نخفق الخليط لحد ما يصير ناعم خليط كريميييييي
واول ما يصير كريمي منيح .. بنضيف البيضه + ملعقه صغيره فانيليا  ونخفق

وبس تختلط البيضه مع خليط الزبده والنوتيلا .. رح نضيف المكونات الجافه يعني خليط الدقيق

ونحرك خليط الدقيق مع خليط الزبده بايدنا ابو بملعقه خشب  وبس يختلطو نضيف الشوكولا  .. انا هون بستعمل شوكليت شيبس كتير حجمها صغير بصراحه كانت اول مره ادوقها واشتريها بالعاده اشتري الحجم الاكبر لانو المتوفر في كل سوق بس لما حصلت هاي ودقتها .. عنجد طعم تاني للكوكيز وافضل بكتيرررررررررر من اللي حجمها اكبر ازا حصلتو هل مقاس الصغير كتير بكون افضل ما حصلتو الاكبر او بتقطعو الشوكولا  بتجيبو لوح كبير وبتقطعو بالسكين

نخلط الشوكولا مع الخليط منيححححح بعدين نحطو بصحن ونغلف عليه منيح وندخلو عالتلاجه لمده ساعه ضروري ضروري ضروري تحتفظو فيه بالتلاجه لساعه هاي خطوه مهمه مشان الخبز .. ماشي يا كتاكيت ..

هلئ بنطلع الخليط من التلاجه بعد الساعه .. بنسخن الفرن 180 (350)
وبنحضر صينيه عليه ورق زبده او سيلكون ضروري .. ازا مافي رشو طحين عالصينيه ولو اني عمري ما جربت ما اضمن النتيجه كيف ..
هلئ بعملعقه ايسكريم او بايدكم شكلوها زي لما تشكلو الكوكيز وفردوها عالصينيه خلوها حوالي نص سانتي السمك تبعها متل بالصوره  .. او جربو انتو كيف تحبو .. تحبو تخملوها شوي وتكون من جوي طريه اكثر .. اعملو تجربه باول صينيه دايما اول مره تجربه  بكل وصفه

اندخل الصينيه الفرن يعني من 12 ل 15 دقيقه اكتر من هيك لا انا عن نفسي بحطو 15 دقيقه  وكل واحد والفرن تبعو
وهيك بطلع من الفرن وبنتركو يبرد ما نكسو وناكلو متل المفاجيع اتركوه عالصينيه يبرد عشر دقايق

وهاد هو كوكيز بالنوتيلا عنجد هاد احسن كوكيز اكلتو بحياتي خفيف وممكن نخلص عليه كلو مره وحده
وصحتين
mjk cooking

كيك الجزر carrot cake

كيك الجزر    carrot cake

هذي افضل كيكه جزر ممكن تذوقوها وحتي انا ما احب كيك جزر كيك كوسا .. بس عنجد طعم خيالي وشي جديد .. بهل وصفه رح نحتاج لميزان طعام .. ضروري ميزان اللكتروني وطبعا سعرو رخيص لا تخافو  وبدنا المكايل اللي طبعا لازم تكون موجوده بكل بيت هاي من الاساسيات  ...
المقادير  :
2 ونص  كوب دقيق
340 غرام جزر مبشور  ( المبشره العاديه مو الصغيره كتير )
1 ملعقه شاهي بيكنج صودا ( هون بالبيكنج صودا والبيكنج باودر استعملو معلقه صغيره تبعت الشاي ما تستعملو مكايل )
1 ملعقه صغيره بيكنج باودر
نص ملعقه صغيره ملح
ربع ملعقه صغيره قرفه _ ربع ملعقه صغيره جوز الطيب _ ربع ملعقه صغيره all spice
1 وثلث   .. واحد وثلث كوب سكر   
3 حبه بيض
ربع كوب سكر بني ( غامق ) سامعين غامق مش تحكي ما عندي وتستعملو فاتح
170 غرام لبن
170 غرام زيت
ـــــــــــــــــــــــــــــــــــــــــــــــــ
التغطيه :
230 غرام جبن فلادلفيا او كيري المكعبات  بدرجه حراره الغرفه
4 ملعقه كبيره زبده بدره حراره الغرفه
1 ملعقه صغيره فانيليا
2 كوب سكر ناعم مطحون 
ــــــــــــــــــــــــــــــــــــــــــــــــــــ
اول شي نكون محضرين كل مواد الكيك مطلعينها قبل ب 4 ساعات نخليها تكون بدرجه حرارت الغرفه .. ليش لانو رح يعطينا نتيجه افضل بكتير بنحضر البيض واللبن والجزر كلو يكون بدرجه حراره الغرفه .

_ نسخن الفرن 350 ( 180 )  ونجيب صينينه مدوره مقاس 9 ندهنها بزبده ونرشها بطحين
 
بنخل الدقيق والمواد الرافعه والمطيبات ( الدقيق + البيكنج باودر والصودا + الملح + البهارات )  بدون السكر
باخد الدقيق وبحطوه عالجزر وهلئ بحركها بايدي  بنحرك لحد ما ينخلط

 هلئ  بنحط بالخلاط ( البيض + الفانيليا + السكر الابيض + السكر البني + اللبن )  بنشغل الخلاط والزيت اصبه عالخليط من الفتحه اللي فوق تبع الخلاط بصبه علي شكل خيط رفيع
فهمتو يعني بنشغل الخلاط وبنصب الزيت علي شكل خيط رفيع من الفتحه اللي فوق  وهاي خطوه مهمه كتير مش تروحو تحطو الزيت ويلاااااا كلو مع بعض وتقولو نفس الشي اعملو متل ما عم بقول

هلئ بنجيب هاد الخليط وبنحطو علي خليط الدقيق والجزر  .. وبملعقه خشب بنحرك 10 ثواني بالزبط لا تركو اكتر او اقل عشر ثواني وبس وازا في اشيا ما ختلطت مو مشكله بالفرن بتصير

وبنقل الخليط عالصينيه اللي مجهزينها وبدخلها الفرن

هلئ بندخلها الفرن علي درجه حراره 350  ( 180 ) بنخليها 45 دقيقه بالزبط بعدين  .. بنخفض درجه حراره الفرن ل  325 (170 ) ووبنتركها كمان 20 دقيقه
صحيح بتشوفو المده كبيره بس ما تخافو انتو هيك بالسليم .

بنطلعها من الفرن بنخليها 15 دقيقه بالصينيه بعدين بنقلبها علي شبك وبندخلها الثلاجه مع الشبك 15 دقيقه  وبنتركها تبرد قبل ما نحط عليها الكريم تشيز

 هلئ التغطيه ( كريم تشيز )  .. طبعا مستحيل كيك جزر بدون كريم تشيز اصلا ما رح تنوكل بلاه
بنحط  كل المقادير مع بعض بس شرط تكون بدرجه حراره الغرفه وبنخلط لحد ما تصير خليط كريمي وبنزيها ع كيفكم

mjk cooking
 

تارت الاجاص الفرنسيه

تارت الاجاص الفرنسيه

 هذي تارت فرنسيه 100 % وطعمها خطير وراقيه جدااا انا اضمنلكم انو رح تحبوها ورح يكون طعمها خطير وطبعا هي اجاص ولوز خدولكم عاد الطعم كيف يا ويلي يا ويلييييييييي شي بعذب القلب

المقادير :

كوب ونص دقيق
نص كوب سكر
ربع ملعقه صغيره ملح
اصبع زبده (113 غرام )  بارده جدااا ومقطع مكعبات صغيره
صفار بيضه
حوالي ربع كوب ماء بارده جدا


هلئ بنحط الدقيق + السكر  + الملح بالمولنكس وبنخلط وبعدين بنضيف الزبده وبنشغل وبنوقف بنشغل وبنوقف لحد ما يتحول الخليط ويصير متل الشوفان او متل حبات البازيلا بس اهم شي شغلو ووقفو شغلو ووقفو كل ثانيه لا تشغلوها وتروحو تحكو بالتلفون ...
بعدين نحط صفار اليضه في طبق نخفقها شوي عشان ما تتكتل مع الطحين وضيفها لخلط الطحين ونحرك
هلئ بنشوف هون العجينه كيف قوامها وبنضيف ماء بالتدريج شوي شوي مش بالضروره نحتاج لربع الكوب ماء ممكن اقل وممكن ما نحتاج اصلا  .. بنمسك العجينه بايدنا ازا تجمعت يعني خلص  بنطلعها وبنسكر عليها كتير منيح وبنخليها ترتاح ساعتين بالتلاجه اقل شي ساعتين ممكن نحطها بالفريزر لشهر ما رح يصيرلها شي

شايفين بالصوره كيف لفيت العجينه كويس وخلوها متل ما حكيت بالتلاجه ساعتين

هلئ بعد ما نطلع العجينه من التلاجه وبنفردها على شويه دقيق واحطها بصينيه التارت وارجعها عالتلاجه كمان مره حوالي 30 دقيقه لساعه  ... بعدين نطلعها من التلاجه ونخرمها بالشوكه ونحط عليها الثقل وندخلها الفرن علي درجه حراره 190    لمده 25 دقيقه بالزبط وبعدين بطلعها من الفرن وبشيل التقل وبرجعها كمان عشر دقايق 

                                              شايفين بالصوره كيف مخرمها بالشوكه

                                                   
                                                       هون حطيت الفول كثقل لاني بكرهو

الاجاص
الاجاص كتير سهل اول شي لو بتستعملو اجاص معلب مافي داعي تعملو كل هل خطوه حتطولوه من العلبه تنشفوه وتقطعوه اما ان كان عندكم اجاص طازج وهو اللي طعمو احلى بكتيرررررررررررررررررررررر  رح تعملوو الاتي

المكونات :
4 كوب ماء
كوب وربع سكر
ملعقه ونص كبار عصير ليمون
وحوالي 5 حبات اجاص

اول شي نجيب الاجاص نقشره ونتركه ع جنب
نحط السكر عالماء وعصير الليمون يعني ( شيره او قطر ) واول ما يغلي احط فيه الاجاص المقشر واوطي النار واتركو بحدود عشرين دقيقه

بعد عشرين دقيقه نطلعهم من النار ونحطهم علي مناديل ورقيه ونشفهم

هلئ ممكن نحفظ الاجاص لمده يومين وومكن نستعملو علي طول للوصفه بس سكرو عليه منيح الله يخليكم


خليط اللوز :
ثلثان كوب من اللوز المقشر
1 ملعقه كبيره دقيق
7 ملاعقه كبيره سكر
6 ملاعق زبده
ملعقه صغيره من الفانيليا السائله او روح اللوز
بيضه

في الخلاط نضع اللوز وبنشغل لحد ما يصير خليط ناعم قدر المستطاع ثم نضيف الدقيق ونخلط

  هلئ بنضيف السكر وبنخلط كمان لحد ما ينعم الخليط اكتررررر

 

بعدين نضيف الزبده ونخلط ونضيف البيض وروح اللوز او الفانيليا انا بصراحه حاط فانيليا لاني ما بحب ريحه روح اللوز

 

 

وبنخلط لحد ما نحصل علي خليط ناعم هلئ هاد الخليط ممكن نحفظو بالتلاجه ليومين بس يتسكر منيح اكيد وبصير جامد ساعتها بنتركو يدوب بدرجه حراره الغرفه او بحمام مائي او بتحطوه بالمايكرويف لعشر ثواني ضلكم واقفين عندو افتحو حركوه كل كم ثانيه لا تتركوه وتروحو كانكم بتذوبو شكولا  ما بدنا البيض اللي فيه يستوي

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
هلئ كل اللي كان عمليه تحضير مسبق لخليط اللوز والاجاص ممكن نعملهم قبل يومين وانا عن نفسي بنصحكم بهيك
نيجي للمرحله الاخيره واللي هي اسهل شي ...
بعد ما نكون خبزنا عجينه التارت زي ما شرحنا فوق ... وتكون بردت او صارت بدرجه حراره الغرفه نيجي لعمليه التطبيق
نحط خليط اللوز علي التارت 
وكمان نجيب الاجاص ازا كان منزل مويه ننشفها منيح ونقطعها بالنص ونشيل البزر ونقطعها شرائح رفيعه وونقلها بواسطه سكين علي التارت

 

انا مزينها بهل طريقه انتو زينوها بالطريقه اللي بدكم اياها  حتي هون انا مقطعها خميل مفروض ارفع من هيك

 

 

بندخلها الفرن علي درجه حراره 180 بتاخد بحدود 35 دقيقه ممكن اكتر ممكن اقل حسب الفرن بنشوف لحد ما تتحمر منيح

 

 

وبس تبرد شوي بنرش عليها شويه سكر بودره وممكن تتاكل مع الايسكريم وصحتين

 

 

MJK Cooking

 

 

 

كب كيك بدون بيض !!

كب كيك بدون بيض !!

بصراحه وبكل شفافيه وصدق انا من عشاق هاد الكب كيك لانو سهل كتير في التنفيذ والمواد متوفره دايما في البيت والاشي المهم اكثر انو من دون بيض وهاد موضوع مهم للي عندهم حساسيه من البيض او ما بحبوه  يلا خليني احكيلكم كيف ... ركزو معي

المكونات :
3 كوب دقيق
2 كوب سكر
نص كوب بودره الكاكاو الساده
2 ملعقه صغيره بيكاربونات الصودا
ا ملعقه صغيره ملح
ا ملعقه صغيره قرفه


2 كوب مائ ساخن ( شبه مغلي )
ثلاث ارباع كوب زيت
2 ملعقه كبيره خل
2 ملعقه كبيره قهوه
2 ملعقه صغيره فانيليا

اكيد استغربتو من المكونات فيها كتير سوائل وخصوصا الخل بس رح تشوفو النتيجه بالاخر من اروع ما يكون وما رح تعملو غير هل كب كيك من بعد اليوم
التطبيق :

في الخلاط نضع الدقيق + السكر + بيكربونات الصودا + الملح + القرفه + الكاكاو  طبعا كل هل مكونات بنكون نخلناهم سوا وبنحطهم كلهم بالخلاط وبنقلب لحد ما يختلطو مع بعض

الماء بنحطها عالغاز واول ما تغلي نطفي عليها ونحطها في طبق اخر ونضيف عليها الزيت + الخل + القهوه + الفانيليا  يعني المواد السائله
نضيف المواد السائله علي المواد الجامده يعني بنحط خليط الماء والزيت .. علي خليط الدقيق والكاكاو وبنشغل الخلاط علي سرعه متوسطه لمده من دقيقه ل دقيقتين يعني لحد ما يصير ناعممممممممممم
طبعا بنكون محضرين الفرن ساخن علي درجه حراره 180 ... وبنملي قوالب الكب كيك ثلاث ارباعها والخبز بكون من 15 _ 20 دقيقه طبعا بنختبر النضج بادخال عود خشبي في الكيك ازا طلع نضيف يعني خلص صار تمام

هلئ نيجي علي الفروستنغ اللي شايفينو عالكب كيك طبعا هاد بالنسبه اللي انا افضل كريمه ممكن نزين فيها الكب كيك لانها رح تعطينا افضل نتيجه في بالتزين ورح نحصل عالشكل اللي بدنا اياه غير ان طعمها روعه ودسمه

 الفروستنغ :
160 غرام زبده بدرجه حراره الغرفه
240 غرام سكر بودره
1 ملعقه صغيره فانيليا سائله
400 غرام كريم تشيز _ جبنه  فلادلفيا او اي نوع جبنه ممكن كيري
3 _ 4 ملاعق كبار حليب سائل
رشه ملح

بنحط الزبده والفانيليا والكريم تشيز ورشه الملح بالخلاط ونخفق لحد ما يتجانسو وبعدين نضيف السكر بودره بالتدريج لحد ما نخلص علي كل كميه سكر البودره
هلئ بنشوف قوام الكريمه رح تحتاج حليب او لا هاد انتو بتقدروه لانو بختلف حسب نوع الجبنه بس عشان تتاكدو ضيفو ملعقتين حليب وشوفو القوام
بنحط الكريمه في الثلاجه حتي تتماسك ونقدر نزين فيها

هذه الكريمه ممكن تنحفظ بالتلاجه لمده اسبوعين بس سكرو عليها منيح .. وبالفريزر لمده شهر

 

دجاج حامض حلو Sweet and Sour chicken

دجاج حامض حلو   Sweet and Sour chicken

في هاي الوصفه السر مو بس بافضل المكونات السر بطريقه الطبخ .. هون لازم نكون كتير دقيقين يعني لازم يكون كل شي ع اعلى نار ممكن .. لازم نكون محضرين كل  قبل ما نبلش طهي .. افضل شي لهل اكله انو نستخدم مقلاه صينيه طبعا رح تعطينا نتيجه افضل من العادي ..

بهل وصفه انا بستخدم بالعاده حتي اكون صريح معكم دجاج جاهز بوب كورن ومو بس انا اللي بستخدمو المطاعم كمان بستخدمو الجاهز بهاي الوصفه بالتحديد لانها بتعطيني نتيجه اطعم بكتير من صدر الدجاج العادي
اذا استخدمو دجاج بوب كورن واللي ما عندو هلئ بنعطيه الطريقه بصدر دجاج عادي ...

هاد اللي بالصوره البوب كورن الجاهز للي ما عرفو

للدجاج : صدرين دجاج مقطع مكعبات
           2 ملعقه صغيره صويا صوص
          2 فص ثوم مقطع صغير
          2 ملعقه صغيره نشا
          رشه سكر _ رشه ملح _ رشه فلفل

صوص الحامض حلو :
      نص كوب مرق دجاج او ماء
      3 ملعقه كبيره كتشب
      2 ونص ملعقه صغيره نشا
       2 ملعقه كبيره خل
      2 ملعقه كبيره صويا صوص
      ملعقه ونص كبيره سكر
      رشه ملح

الخضروات :
بصله مقطع مكعبات
 كوب اناناس مقطع مكعبات
فلفل احمر حلو مقطع مكعبات
فلفل اخضر حلو مقطع مكعبات
2 ملعقه كبيره زنجبيل مفروم
2 ملعقه كبيره ثوم مفروم

الطريقة :
اخلط كل مقادير الدجاج واحطها ع جنب
كمان صوص الحامض حلو اخلط كل مقاديرو واتركها ع جنب
احضر كل شي حولي من خضروات والزنجبيل والثوم كل شي لازم يكون جاهز جنب النار
 احط زيت واقلي الدجاج ع حراره عاليه كتير لحد ما يستوي واشيلو من علي النار وازيد زيت لو ما كان في زيت كفايه واحط البصل لنص دقيقه ثم اضع بقيه الخضار والاناناس واقلبهم لحد ما يذبل شوي بعدين بنحط الزنجبيل والثوم واحرك لحد ما تطلع ريحتهم بعدين بنحط الدجاج والصوص واضل احرك لحد ما يثقل الصوص واحط رشه ملح صغيره بالاخر ورشه فلفل

 

mjk cooking

شوكليت فدج كوكيز

هاد النوع من الكوكيز قوامة مختلف تماما عن اي نوع كوكيز لانو فدج بس مقرمش وخفيف ونحيف
المكونات :
1واحد كوب بيكان او جوز أو بندق مجروش
نص كوب أو 60 جرام دقيق
1واحد ملعقة صغيرة بيكنج باودر
ربع ملعقة صغيرة ملح
واحد ملعقة صغيرة قهوه (اختياري)
450جرام شوكوﻻ مقطع صغيرة
57 جرام زبده
350 جرام سكر
4بيض
ملعقة صغيرة فانيليا
كوب شوكليت شيبس ابيض
كوب شوكليت شيبس اسود
الطريقة :
نضع الزبده والشوكوﻻ علي حمام ماء دافي حتي تذوب الشوكوﻻ ( سامعين حمام ماء دافي مش مغلي )
اخفق اﻷبيض والسكر لحد ما يصير لون فاتح بحدود 3 دقائق
اخلط الطحين والمواد الرافعه والقهوه وبنحطهم ع جنب
اضع الشوكولاتة المذوبه ع خليط البيض واخلط

بعدين بنحط الطحين وبنحرك بالمعلقه من تحت لفوق

وبعدها بنضيف الجوز المجروش وبنحرك

وبعدها الشوكليت شيبس وبنحركهم

بنغطي الخليط كلو وبنحطو بالتلاجه من نص ساعه لساعه او لتاني يوم
بنطلعهم من التلاجه وبنكورهم بايدنا ع شكل كوره صغيره ( دايما جربو الحجم باول صينيه بتشتغلو فيها شكلو اكتر من حجم وشوفو شو بصير معكم وشو اللي بزبط معكم ) ( عن نفسي لازم دوائر صغيره لانها رح تفرش كتير بالصينيه ورح تمتد لانها كوكيز فدج وبتكون كتير رقيقه وفلفي من جوا )

بكون الفرن ساخن 180 بتحطوهم بحدود 12 دقيقه او اكتر شوي حسب كل واحد بعرف الفرن تبعو انا شو بعرفني ..

صحتين
mjk cooking